പുതിയ ഏദൻ

1) വിശ്വാസത്താൽ, യേശുക്രിസ്തു നിങ്ങൾക്കായി നൽകിയിട്ടുള്ളതിനെക്കുറിച്ച് ആഴത്തിൽ ചിന്തിക്കുക—നിങ്ങളുടെ എല്ലാ പാപകരമായ ആഗ്രഹങ്ങളും ഇല്ലാതാക്കാൻ വേണ്ടത്ര ശക്തി. സ്വന്തമായി നിങ്ങളുടെ പാപത്തെ കീഴടക്കാൻ നിങ്ങൾക്ക് ശക്തിയില്ലെന്ന് തോന്നിയാലും, പാപതിനെതിരെയുള്ള പോരാട്ടത്തിൽ നിങ്ങൾ ക്ഷീണിതനാകുകയും പകുതി വഴിയിൽ പരിശ്രമം  ഉപേക്ഷിക്കാൻ തയ്യാറായാലും, ക്രിസ്തുവിൽ ധാരാളം സഹായമുണ്ടെന്ന് അറിയുക (ഫിലിപ്പിയർ 4:13).

നിങ്ങളുടെ ഏറ്റവും വലിയ ദുരിതത്തിൽ, അവന്റെ കൃപയുടെ പൂർണ്ണത, അവന്റെ ശക്തിയുടെ സമ്പത്ത്, നിങ്ങളുടെ പിന്തുണയ്ക്കായി കരുതിയിരിക്കുന്ന അവന്റെ ശക്തിയുടെ നിധികൾ എന്നിവ ഓർക്കുക (യോഹന്നാൻ 1:16; കൊലോസ്യർ 1:19). ഈ സത്യങ്ങൾ നിങ്ങളുടെ മനസ്സിൽ സൂക്ഷിക്കുക. തന്റെ ജനത്തിന് മാനസാന്തരം നൽകാൻ ക്രിസ്തു രാജാവും രക്ഷകനുമായി ഉയർത്തപ്പെട്ടിരിക്കുന്നു (പ്രവൃത്തികൾ 5:31)—അവൻ മാനസാന്തരം നൽകുന്നുവെങ്കിൽ, പാപത്തെ ഇല്ലാതാക്കാനുള്ള ശക്തിയും അവൻ നൽകുന്നു, കാരണം അത് കൂടാതെ യഥാർത്ഥ മാനസാന്തരം നിലനിൽക്കില്ല. അവനിൽ വസിക്കുന്നതിലൂടെ നാം ശുദ്ധീകരണ കൃപ സ്വീകരിക്കുന്നുവെന്ന് യേശു തന്നെ നമ്മോട് പറയുന്നു (യോഹന്നാൻ 15:3).
നമ്മുടെ ആവശ്യങ്ങൾ നിറവേറ്റാൻ പൂർണ്ണമായും ക്രിസ്തുവിൽ മാത്രം  വിശ്വസിക്കുന്നതിലൂടെ അവനിലുള്ള നമ്മുടെ ആശ്രയം പ്രകടമാകുന്നു. അവനുമായുള്ള നമ്മുടെ ഐക്യവും അവനിലുള്ള നമ്മുടെ തുടർച്ചയായ ജീവിതവും വിശ്വാസത്തിലൂടെയാണ് വരുന്നത് (റോമർ 11:19-20).

അതിനാൽ നിങ്ങളുടെ ആത്മാവ് വിശ്വാസത്താൽ ഇതിനെക്കുറിച്ച് ഇങ്ങനെ  ചിന്തിക്കട്ടെ:
“ഞാൻ ദുർബലനും ജലം പോലെ അസ്ഥിരനുമാണ്. എനിക്ക് വിജയിക്കാൻ കഴിയില്ല. ഈ പാപം എന്നെ സംബന്ധിച്ചിടത്തോളം വളരെ ശക്തമാണ്, എന്റെ ആത്മാവിനെ നശിപ്പിക്കുമെന്നിത് ഭീഷണിപ്പെടുത്തുന്നു. എന്ത് ചെയ്യണമെന്ന് എനിക്കറിയില്ല. എന്റെ ഹൃദയം വരണ്ട, തരിശായ ഭൂമി പോലെ, സർപ്പങ്ങളുടെ വാസസ്ഥലം പോലെ തോന്നുന്നു. ഞാൻ പല തവണ പാപത്തെ ചെറുക്കുമെന്ന് വാഗ്ദാനങ്ങൾ നൽകിയെങ്കിലും അവയെയെല്ലാം ഞാൻ ലംഘിച്ചു; ഞാൻ പ്രതിജ്ഞകൾ ചെയ്തു, വീണ്ടും പരാജയപ്പെടാൻ വേണ്ടി മാത്രം. പല തവണ, ഞാൻ യുദ്ധത്തിൽ വിജയിച്ചെന്നും ഒടുവിൽ സ്വതന്ത്രനാകുമെന്നും ഞാൻ കരുതി, പക്ഷേ ഞാൻ വഞ്ചിക്കപ്പെട്ടു. ഇപ്പോൾ എനിക്ക് വ്യക്തമായി കാണാം— ക്രിസ്തുവിന്റെ വലിയ സഹായവും രക്ഷയും കൂടാതെ ഞാൻ എന്നെന്നേക്കുമായി നഷ്ടപ്പെഡുവാനും  ദൈവത്തിൽ നിന്ന് പൂർണ്ണമായും അകന്നുപോകാനുള്ള അപകടത്തിലുമാണ്.
എന്നിട്ടും ഈ അവസ്ഥയിൽ പോലും ഞാൻ എന്റെ പ്രയത്നം ഉപേക്ഷിക്കില്ല. എന്റെ തളർന്ന കൈകൾ ഉയരട്ടെ, എന്റെ ദുർബലമായ കാൽമുട്ടുകൾ ബലപ്പെടട്ടെ! കർത്താവായ യേശുവിനെ നോക്കുക—അവന്റെ ഹൃദയത്തിൽ കൃപയുടെ പൂർണ്ണതയും അവന്റെ കയ്യിൽ എല്ലാ ശക്തിയുമുണ്ട്. അവന് എല്ലാ ശത്രുക്കളെയും നശിപ്പിക്കാൻ കഴിയും. അവനിൽ, എന്നെ രക്ഷിക്കാനും നിലനിർത്താനും വേണ്ടതിലധികം ശക്തിയുണ്ട്. എന്റെ തളർന്ന, പരാജയപ്പെടുന്ന ആത്മാവിനെ എടുത്ത് എന്നെ ഒരു വിജയിയെക്കാൾ അധികം ശക്തനാക്കാൻ അവന് കഴിയും. എന്റെ ഹൃദയത്തിലെ വരണ്ട, ജീവനില്ലാത്ത ഭൂമിയെ ഒഴുകുന്ന നീരുറവയാക്കാൻ അവന് കഴിയും. ഒരിക്കൽ നിന്ദ്യമായ ആഗ്രഹങ്ങളും കത്തുന്ന പ്രലോഭനങ്ങളും നിറഞ്ഞ ഈ ഹൃദയത്തെ അവന്റെ മഹത്വത്തിനായി ഫലം കായ്ക്കുന്ന ഒരു സ്ഥലമാക്കി മാറ്റാൻ അവന് കഴിയും (യെശയ്യാവ് 35:7)”

പൗലോസിനെ ബുദ്ധിമുട്ടുകൾ തരണം ചെയ്യാൻ ദൈവം സഹായിച്ചത് തൻ്റെ കൃപ ധാരാളമുണ്ടെന്ന് അവനെ ഓർമ്മിപ്പിച്ചാണ്. “എൻ്റെ കൃപ നിനക്ക് മതി” എന്ന് ദൈവം പറഞ്ഞു. (2 കൊരിന്ത്യർ 12:9). അതുപോലെ, ക്രിസ്തുവിൽ നിറഞ്ഞിരിക്കുന്ന സഹായത്തിൽ വിശ്വസമർപ്പിച്ച്  എപ്പോഴും ഓർക്കുക – നിങ്ങൾക്ക് ആവശ്യമുള്ളതിലും കൂടുതൽ ശക്തി അവനുണ്ട്. ഏത് സമയത്തും, ഏത് പ്രലോഭനത്തിലും തരണം ചെയ്യുവാനും ജയിക്കാനും ആവശ്യമായ ശക്തി അവൻ തരും.